嚟到英國地大物博，好在仲有朋友，有事仲可揾人傾，其中唔少係創辦人同老闆。

近幾個月，俾傳統英資銀行大整古，每次匯款到加密幣交易所，戶口都要被凍結，想解鎖就得打上CS，重覆又重覆聽對方一大輪「訓話」，每次歷時20至30分鐘。

然後又輪到「政府認可」嘅加密幣交易所，冇預兆地凍結了戶口，前後3個月咁耐，平白錯過唔少投資或出貨機會。好在朋友出謀劃策，有關問題已經解決。

不管是傳統金融機構，抑或親政府交易所，左一句「為你好」，右一句「保障你」，都有機會恣意踐踏和侵犯私有財產。歸根究底，會否只係「權」和「錢」從中作祟，原來是為了維護控制或稅收？我覺得因人而異，又不應妄下定論。

但可以大膽講句，世上但凡打著「安全啲、保障啲、安心啲、健康啲」口號的規管和限制，各式其式，多數絕非好東西，而且遠不止於金融領域。舉例禁售電子煙加熱煙的國家，美其名保障健康，實則是剝奪煙民選擇更低風險產品的自由。

我無意妖魔化所有規管機構，但即使架上「善良的眼鏡」，看出規管措施的原意，真心出於善意都好。但只要這些規管，無法帶出想要的效果，並構成無數人的不便甚至痛苦，它們就非但沒有「得分」，甚至可能是「負分」的。

打個比喻，就像一個精明能幹的女人，不斷拼命付出，自詡是個最模範的母親和妻子。但這種拼命的「付出」，往往很易變成「控制」、成為家人壓力的最大來源。

為什麼？因為就算是發自內心、出於善意的付出，背後其實也包含了企圖心：期望以自身的付出，去換取家人對自己的愛。摻雜了這種企圖心的人，得不到自己期望的回報，就會有失落感，長年累月的下來，就會形成變本加厲的控制和怨恨。

傳統銀行和監管機構也是同一個「大婆心態」，既然我「都只係為咗你著想」，何解你要走資到加密貨幣市場？點解行蹤不能時刻向我報告呢？