我有唔少電訊界的朋友，多年以來，不論開會、做客仔、傾生意、認識過不少本地電訊人，總而言之，特徵係：精明，細心，效率高，善於解決問題。但問題係，何解在一班「叻仔」管治底下的電訊公司，形像總係各行各業之冠（倒數個隻），部分更猶如過過街老鼠人見人憎？

要知道，若計電訊基建、技術、產品質素，其實香港比起世界其他地區一點都唔輸蝕，對比美國/歐洲唔少地方，更可以話係有過之而無不及。但香港人從來都不能在這方面獲得優越感，相反，提起電訊服務只會記得收費陷阱同埋「好難解約」。

以我所知，其實部分電訊公司高層會認為港人身在褔中不知褔，他們認為，相比起台灣和大陸，其實香港無論在產品質素同售後服務都已經「算係咁」，好有可能，佢地夜晚發開口夢都可能會話：「我明明好叻仔架，點解會成個世界都唔鐘意我？」

台灣的電訊人口約比香港多20%-30%，但電訊商的年收入動輒以百億港元計（最大三家，唔計威寶）；相反，香港這邊廂電訊公司能夠賺過千萬不用蝕錢已差不多要劏雞還神。為什麼？我嘗試用例子解答：台灣sms不算普及，但shortcode（簡碼）卻大行其道。Shortcode是較短易記的號碼。舉例在台灣電召的士，可以打「1688」，打通後便會一直計錢，每分鐘收費可以高達6-10台幣（就像香港當年的173吧），直到現在，香港是有但已經不流行173了，但台灣人日常卻依然要負擔這些逐秒計錢的賬單。所以有說台灣的電召的士台，光靠shortcode收入就能達到收支平衡甚至賺錢。換個角度，講惡，台灣電訊商比香港更惡，因而收入亦更多。

換而言之，香港電訊商在商業模式方面，比起台灣（大陸更加不用說）已經進步很多了，這樣還要瘋狂地被消費者和網民口誅筆伐，又難怪他們心底裡不是味兒。

問題是比起互聯網公司或軟件公司一日千里的改革速度，本地電訊基建的革新，又真係不過是小巫見大巫。世界變得快，科技轉得更快，幾多成功的電訊產品，例如住宅電話、例如IDD、今日都已經變成「唔係唔使錢都得架咩？」上一代的電訊叻仔想安於現狀，想拖得就拖，唔想改變運作模式，唉，皆係人之常情，不要怪他們。

這種情緒，就好似香港經濟香港精神一樣：曾經光煇，現已愔然，其實都幾唏噓下。