中秋過後，葉太請鄰居王婆食月餅。

「新聞話喎，環保團體做左調查，話平均每個家庭，今年會掉最少一個月餅。」「咁啱，今年我老公拎左好多月餅返嚟。有傳統有潮州有冰皮有雪糕，全部人地送架。王婆你唔使客氣呀，食多啲啦！」

「葉太你真係好人「暑」，我知，啲環保人士仲好似話建議立法管制月餅包裝…」王婆未講完，葉太已經忍不住搭嘴：「早就要管啦！頭先呀，我係垃圾站見到啲月餅盒堆到成座山咁高呀，真係睇見就眼冤！」

「哼，計我話，政府早應該立法，強制月餅商唔準用鐵盒包裝，等我睇下個衰仔仲可以攞咩去煲爉！」葉太講得性起。

「月餅盒又唔係完全無用既，我有唔少老友都會用嚟裝吓野。」王婆邊吃邊說。

「王婆，你唔明架啦，查實啲月餅盒好唔環保架！」「唔止呀，近九成人仲話，戶外賞月時候，佢地選擇即用即棄餐具，主要是紙碟、紙杯和膠叉，從此推算，呢個秋可能消耗了超過560萬件即棄餐具呀！」

「唓…咁你平時又拎咁多膠袋？」王婆忍不住搶白她。

「欸…膠袋可以裝野吖嘛。之但係月餅盒係無用既包裝物料喎，係咪先？」

「阿媽妳成日買個啲新衫夠係包裝物料啦，咪一樣咁唔環保，哈哈哈哈！」小葉煲完爉返到屋企。

「玩到咁夜至返，你個衰仔係咪想死呀？」葉太扯開話題駡道。

「食件月餅啦小葉。」王婆馬上說。

「衰仔，你阿媽支持環保，都係為左你呢個下一代咋，枉你仲駁嘴駁舌！」葉太繼續嚕嘟。

王婆心想：「係啦，我啲阿婆，無人無物，無下一代，你地啲人成日同我講環保，仲要揀正大時大節嚟講，又唔識得崩口人忌崩口碗，係咪專登刺激我吖？」

想到這裡，王婆百感交集，月餅再難下嚥。她動身就走，臨走說：「我都係唔食啦，其實頭先我未講完，而家環保團體建議立法管制月餅包裝…廢物的處理方法啫，不過遲下會唔會連食月餅都管埋就好難講啦。」

《2008年9月16日刊於蘋果日報》

後記，篇文既靈感，主要係嚟自其他人，例如藍天蔚同黃子華（果然：黃+藍 = 綠 XD），大家有興趣不妨睇埋佢地講咩。