終於忙完辦喜事，出錢出面又出力，成個人散晒。眾所周知，辦喜事者十居其九都身不由己，十足扯線公仔，而背後牽針引線既發功者，就當然係功力深厚既家屬成員啦。

話時話，呢期思哲寫扑睇扑，好多時候，主都係靠手機。注意到近期兩位老闆先後話休扑，一位已經回歸，一位發表聲明無耐。思哲懶到死，同兩位老闆無得比，寫扑經常要自我鞭策一翻，但睇到ck既放假聲明但其實都好有共鳴下。

ck老闆話，除左想放個悠長假期之外，亦都好想測試下，響冇寫blog既情況之下，佢會唔會係一個無失禮既好寫手，以及一個無咁無能既好老闆，甚至乎係一個更多時間陪老婆既好老公。（呢句我加既）

係身兼返工、老公、扑架同寫文呢四方面，思哲真係自愧不如。忽然覺得，工作上既multitasking就好像火影忍者（無錯，近排的確迷上左呢套卡通片）入面既傀儡術一樣。傀儡術係一門好利害既忍法，原理係控制木偶傀儡戰鬥。表面上，一個傀儡師如果控制既傀儡數目愈多，好似成支軍團咁，的確係好有氣勢好勁。但事實係，控制既傀儡愈多，平均放係每隻傀儡身上既集中力，反而就會低左，如果遇上另一個實力不相伯仲既傀儡師，你出一百隻，人地用十隻，其實係好睇唔好打，仲隨時會輸添。

又，好似思哲既smartphone手機，以前Palm Treo年代，部機無Multitasking既設計，唔可以同時間開幾個軟件，無錯，我唔可以同一時間，先去渣老闆個場吹水，吹水途中興之所至，開個新browser，又轉台去隔離ck又講緊咩，轉頭又過返渣老闆度繼續玩。不過，其實而家Windows Mobile年代既Multitasking，幾個程式同時開，最弊係會影響到每個獨立程式的質素，例如話中文手寫會detect錯字，Mobile Youtube會睇唔到條片，用藍牙連接PC又會失靈，整體黎講，反而會拖慢左成部手機既效能。

講完一大堆廢苦之言，我諗呢次真係要好好咁prioritize一下工作清單，先可以集中精神做好手頭上幾千樣野。祝ck老闆叉電愉快，繼而返黎賑濟我地呢班餓扑饑民！

[youtube=http://youtube.com/watch?v=CdW9j2OnAfU]