在短視頻時代，創作者經濟正以驚人的速度崛起，但如何高效地製作吸引眼球的影片，卻成為眾多創作者和中小企業主的難題。針對這一痛點，身在英倫的 Harris 鄭康桁創立了 Jupitrr AI，一款專注於短視頻生成的 SaaS 工具，為用戶提供一鍵生成字幕、特效及 B-roll 的便捷功能。自 2023 年推出以來，Jupitrr 不僅在 Product Hunt 上取得亮眼排名，還吸引了包括 BBC、Bytedance 等知名企業支持，成為創作者經濟中的新興力量。
尹思哲：好耐冇同你傾過你嘅 startup 喇喎，係咪讀 「Jupitrr AI」？
Harris：係呀，冇錯，讀音同木星（Jupiter）一樣。
尹思哲：Launch 咗幾耐？
Harris：2023 年 9 月 launch，到而家大約 14 至 15 個月啦。
尹思哲：都已經一年多，主要嘅 user 係啲咩人？係啲專業 creators 定係啲 layman 嘅 small business owner？
Harris：而家我哋主要 target small business owners，因為佢哋冇專業剪片能力，但又需要喺社交媒體做影片宣傳，增加曝光度。例如有人賣樓嘅、做 coaching 嘅、甚至手作產品創業者，佢哋需要影片去 promote 自己嘅業務，但又唔想花太多時間同資源。
尹思哲：哦，咁係啱晒佢哋嘅需求喎！我見過啲 user feedback 話你哋平台好方便，例如講緊故事嘅時候可以自動加入相關畫面、GIF，甚至自己嘅片段。而且用戶都話你哋嘅介面好創新，可謂「劃時代」！不過咁創新嘅 UI，你會唔會擔心好容易俾人抄咗？
Harris：其實冇乜所謂，因為 video editing 呢類工具本身唔係一啲需要特別專利或者牌照嘅技術。最緊要係睇你嘅 business 可唔可以快速搵到目標用戶，提供夠好用嘅產品，並且保持增長。
尹思哲：明！其實 Jupitrr AI 嘅 business model 算唔算係 SaaS？而家已經 break even 未？
Harris：係 SaaS model，而家已經 breakeven 喇！不過 AI 嘅 server 成本高，所以我哋對免費用戶有使用限制，例如唔支持長片或者高解析度（例如 4K），咁樣可以專注服務核心用戶，降低成本壓力。
尹思哲：咁你哋有冇計劃融資？融資後會點樣用資金？
Harris：有！融資視乎你想成為咩類型嘅公司。如果想做 lifestyle business，唔融資都可以。但我哋想打造 high-growth company，甚至成為 unicorn。融資後，資金會投喺產品開發同市場擴展上，加速成長。
尹思哲：咁你哋而家 focus 喺 B-roll 呢個範疇，係咪競爭唔算多？
Harris：係呀，B-roll 係補充影片畫面同資訊嘅部分。市場上有公司專注 A-roll（例如 AI avatar），但唔係太多人專注做 B-roll。我哋見到呢個機會，就專為 small business owners 提供 B-roll 解決方案，例如加 stock video、字幕、GIF 等，令影片更有吸引力。
尹思哲：嗯，我見你哋喺 Product Hunt 嘅排名幾好，有次仲試過排名第一 Product of the week，咁成功有咩秘訣？
Harris：早期我哋用咗好多免費嘅方法，因為最重要係搵到 product-market fit。Product Hunt 同 AppSumo 呢啲平台幫咗我哋好多。Product Hunt 嘅優勢係可以短時間內帶嚟大量曝光，而 AppSumo 嘅用戶會直接購買產品，並且俾 feedback，我哋可以喺呢啲過程中調整產品方向。
尹思哲：咁你喺 Product Hunt 或者 AppSumo 上高做 marketing，要花好多時間準備啲 campaign 嗎？
Harris：係需要嘅。以 Product Hunt 為例，我哋請咗一位 project manager 專注負責 launch。我哋事前已經同用戶溝通，鼓勵佢哋先喺平台建立 engagement，然後幫我哋投票。結果，我哋成功喺 Product Hunt 排到第一，帶嚟嘅用戶增長有 5 至 8 倍！
尹思哲：咁厲害！但我知道除咗排名好，你哋嘅用戶黏性都幾高，係咪？
Harris：係呀，我哋發現每 100 個 sign-up 嘅用戶裏面，有 41 個人最後會 export 條片，呢個係好高嘅數字！市場平均可能係得 5%。但當然，呢個數字背後有代價，因為我哋提供咗比較鬆手嘅免費使用，所以後期我哋收窄咗免費使用嘅範圍，同埋增加咗啲限制。
如果想個 product ready，就要知道你嘅 unique proposition 係乜，然後不斷推出新嘅功能，聽取 feedback。最緊要係問用戶「你嘅 pain point 喺邊？」而唔係聽佢哋話要啲咩 feature。你問佢哋痛點，然後自己諗 solution。正如人哋話，如果你問人想要啲咩，佢哋可能會話「要隻快啲嘅馬」，但其實解決方案係發明部車。咁所以，我哋會自己設 hypothesis，推出產品測試，可能係 private launch，然後再 public launch，睇下結果有咩變化。
尹思哲：咁香港創業，尤其係做 AI SaaS，有冇咩限制或者特別挑戰？
Harris：香港市場其實暫時冇乜特別技術限制，但如果想做 global product，我建議唔好用廣東話或者中文作為主要語言，因為市場規模會細好多。美國市場係最成熟，佢哋樂意用錢買時間。如果呢個工具可以每日幫佢節省 15 分鐘，佢哋會覺得每月俾 20 美金好值得。但香港或者東南亞市場，有時用戶會用時間去慳錢，寧願排隊慳 10 蚊。所以要喺香港做 SaaS，monetize 嘅難度會高啲。
尹思哲：最後想問下，你覺得 AI 對傳統工具帶嚟咗咩影響？好似一下子就俾 AI 顛覆咗。
Harris：冇錯，AI 帶嚟咗根本性嘅改變，尤其係對啲重複性、低創造性嘅工作。例如剪片工具，傳統上需要大量操作，但 AI 可以即時生成結果，幫用戶節省時間。未來，AI 會繼續發展，應用喺更加複雜嘅創意同策略層面。
尹思哲：明白！多謝你嘅分享，好多實用嘅 insights！
Harris：多謝你！期待下次再傾！
The post Jupitrr AI 一鍵生成短視頻 B-roll 解決方案如何成為市場缺口？ appeared first on UNWIRE.PRO.