近幾日，閃出一啲想法，例如「點解好似唔快樂？」「咁落去似乎唔得」之類⋯⋯ 慢慢，就變成一種莫名嘅失落，即係煩惱。
走去睇書，揭開《不反應的練習》，翻到某章「如何與不滿足之心」相處，「登」咗一聲。
至省起，會唔會唔係「我個人有咩問題」，而係「我個腦嘅構造正常係久不久揀啲嘢唔滿意」，等於個肚久不久會餓，個腦久不久會煩，係好正常嘅「生理現象」！
每當「訊號」出現，肚餓又好，煩惱又好，係咪事必要食嘢落肚，或去尋開心，並無絕對嘅答案，因人而異㗎啫。
但至少，正常人都唔會因為「肚餓」懷疑自己病咗，同樣道理，我地亦唔需要因為「煩惱」、「唔滿足」去質疑生活係咪有唔妥。
相反，仲要提醒自己，做人係預咗會煩，因為係人腦嘅正常設計，正如幾健康嘅人都大小二便，唔應該嫌棄佢之餘，聰明人更會識得「享受」佢！