博界檸茶事件（thx腦花花 & 五師兄），似乎已經暫告一段落。思哲呢兩日，因為Samsara一句「blog界基因異變」，trigger我周不時去思考呢件事。

自問唔係勤力的扑架，平日工作加寫文，bandwidth已用得八八九九，女友亦開始咋型。但，今次出乎意料之外玩得咁開心既檸茶事件，講到尾，每個人包括我自己，不過花左些少時間，整篇幾百字既短文。

再講，雖話係幾個扑架call馬，但嚴格黎講，呢次又唔係咩真正既徵文活動，無刻意安排，無獎金無禮品亦無得獎者，至多，叫做換黎一次網上虛擬世界的集體回憶，但起初寫，又點知最後真係咁多人玩。

對檸茶事件既一個想法，係人與人之間，本來就有一種默契/共鳴，好多野，我地其實可以好夾，好同聲同氣。只不過係現實世界，我地釋放能量的範圍有限，共鳴好難凝聚，過得一排無左件事，遺忘左。

但扑架唔同，一兩日，咁多人出手，仲要係純粹貪玩，無咩動機。我覺得係因為web，打破左人際溝通既局限，擴大左釋放能量既範圍，呢個就是web可愛既地方。

孫柏文成日話，web2.0之不過係C2C，唔好講到有咩咁巴閉；係，佢無錯架，淨講product層面，話一個網站係web2.0，同話一個女仔係港女，其實無咩分別；坦白講，以前，未有港女呢個terms，我地夠一早有大把形容詞啦，例如拜金，但無何否定，發明港女呢個詞之後，又真係好多人鐘意用呢個terms喎。

其實，孫柏文係忽略左，web2.0最有意思既地方，係在於精神&文化既層面。以檸茶為例，絕對可以理解成「人人參與，貢獻內容」既web2.0精神。一個聯想，就係龍珠入面，孫悟空最強必殺的元氣彈，都係集合眾人力量先有咁勁。

無論如何，呢次檸茶事件真係又好玩又過癮，我已經決定，將呢次件事件紀錄係本書度，我相信，隨扑架社群愈黎愈大，將來肯定更多呢類集體遊戲。

只係，自己真係好懶，睇怕要再勤力少少，寫好呢個扑先得…