朋友話，行山想快自己行；若想行得遠，最好搵人陪。

我估佢「快」指「速度」，但其實快這個中文字，也可以解「快樂」。

想速度快、過程愉快，定行得遠，既因人而異，也因時制宜。

以上講法，可套用於行山、做人，或者其他事業。

我諗起，日本啲「匠人精神」– 不關心短線利益，亦唔心浮氣躁，相反專注去深化同傳承一門手藝，精益求精，琢磨出品。

但有趣係，呢款「行得遠」嘅做法，好多時候，重點在於自己行，拒絕「揾 partner」，例如唔會動輒搞咩「企業化」「國際化」追求增長。

或者結論係，有冇人陪，同行得快定遠，都冇必然嘅關係，更重要嘅，反而係邊個人陪。

而講起匠人，我又諗起 David。

上次同佢傾計，佢話要由籃球訓練，轉跑道體感遊戲，原因係市場大啲、用戶同商機多啲。

當時我問，點解唔留係原本個題目，接受較細嘅市場，繼續深化個產品，服務少量嘅用戶。

佢當時反應都大：「講到我地好似冇試過咁。」

佢哋算係一個例子，因為堅持做匠人，接觸更多嘅用戶，反過嚟去改題目。

或者結論係，做大定做細，同係咪匠人，都冇必然嘅關係，更重要嘅，反而係有冇精益求精嘅覺悟。

尹思哲