談EQ

除了收之不盡推陳出新的「軟件事故」，最近連「硬件」亦出現問題，兩架救護車死火跪低，拖延了急救。計思哲話，我地唔好怪消防處，佢地只不過負責駕駛，亦唔好鬧壟斷維修的機電署。

唔記得哪本管理書話，今時今日，企業開發新產品同服務，唔可以再諗住「放棄5%質素，換取節省95% 成本」，換句話說，係因為人類既EQ已經跌至谷底，忍受唔到唔完美。利世民君亦話：「比起以前，而家呢個世界進步得太快啦，副產品就係我地既EQ差左好多。」

跟Nokia管理層見面，講開手機，佢地都話：「如果客戶對部手機有咩問題，我地甚至會派人上門教埋你用！」Nokia的手機以耐用聞名（限舊model），如果連Nokia都明白，要保證部手機完全無問題，客人唔發火，根本係無可能，因而安排員工上門幫手，更何況保養救護車係政府的機電署呢？

咩話？死人架喎，咁都唔鬧得？無錯，安全套穿左分分鐘都會死人，當然如果穿左出事，我地或者會埋怨，但至少會明白世上並無絕對risk free呢樣野。再諗深一層，其實我地香港人太幸福，換個非洲人，問佢受左傷，救護車跪低點算，佢可能會答：「受左傷仲搭車做咩？救急？自己醫好咪急救咯，醫唔好咪死咯。」

只要每個香港人識得咁諗，咁我地仲可以有咩煩惱？局長助理、公務員加薪、通脹、醫療事故，一律都唔係問題。所以，現今的香港人，要提昇生活質素，增加個人競爭力，先決條件係，我地先要提高自己的EQ！

邊度最合適修練EQ？公立醫院。信我，想辦法用苦肉計，整傷自己，當係投資，入住公立醫院，住返一頭半個月，只要你可以由始至終保持住不慍不火，你惦左架啦！