移居海外的港人，對以下情境，相信絕不會陌生：
幾個家庭聚首一屋，男女老幼十數人。細路們率先「圍爐」，集合 iPad、手機，然後自成一國，或玩 game 或煲 Youtube，不是 Peppa pig 就是 CoComelon，不然就洗腦短視頻。
這場「盛宴」，加上插滿一地 usb 電源線，客廳頓變機舖。最大分別，細路打側攤於梳化邊食邊玩，其「續航力」更強！望實發光小屏幕一動不動，十足吸吮鴉片煙之清朝遺民！
要不是隔壁慈母，每隔一兩小時「咆哮」過來，相信細路可以一直維持原狀，隨時幾粒鐘。
三至八歲細路
其實別說細路，這些近乎「毒品」科技產物，連大人都難以抵抗。但「邊個至係真正消費者？iPad 和手機不是細路自己買的，科技公司想搞啲細路，問過父母未？
今次故事主角 Nex Playground，一心要帶來改變。22 年底同創辦人李景輝傾過，當時已籌得 2500 萬美元 B 輪，轉戰 motion gaming。作為一支香港人為主的團隊，Nex 更要冲擊全球主要 gaming console 地位。
公司去年推出自家設計的遊戲主機 Nex Playground，主打適合 3 至 8 歲細路玩的體感遊戲，稱之為「pre-nintendo market」。
「我哋已經揾到好鮮明好清楚的定位，三至八歲係細路身體發展最 critial 嘅時間，提供一個新嘅方法俾佢哋 gain confidence in using their body，希望佢哋成長之後，唔會變成『Couch Potato』（由朝到晚痴住梳化之意）！」
現在各大社交媒體、Tiktok 影響力之大，間間都動輒千億市值。世間事 follow the money，就知此風不能停。
寓學習於遊戲
在遠古年代，玩物不一定喪志，例如愛因斯坦，或者高錕教授，都係自小已經一頭倒進科學玩意世界，自己整土製菠蘿，喪玩卻能夠養志。至於日本仔玩摺紙、摺飛機，可以玩到有世界紀錄。
二十年前，未有智能手機，落機舖打街機，或者係屋企打電腦 game，都屬另類嘅「修行」：至少見到真人，感染街機文化；留係屋企玩電腦，不論「砌機「定「改 game」，都是電腦高手的入門課。
來到今天，手機上小遊戲同社交媒體，為玩而為、為睇而睇。雖然耗上大半日，唔會記得睇過咩、玩過咩，純粹燃燒時間同生命。
Nex Playground 除了體感遊戲，去年宣布聯乘芝麻街工作室，一齊推出學習遊戲。
舊年 Nex Playground 首次 pre-sale，主機 179 美元再加每年 89 美元遊戲 pass，隨即售清 5000 部，九成屬美國用戶，David 話早知已入夠一萬部。
「我唔係一個會喊嘅人，有次放假去滑雪，食早餐嗰陣，睇緊公司啲 user community。見有人話買咗咁耐至 ship，跟住就即刻有 user 出嚟維護我哋，話呢間 startup unlike many other，我嗰下眼淚突然跌出嚟，因為見到啲體諒你嘅 user，仲要唔係淨係一次，佢哋喺網上周圍都好維護我哋。」
是否一點「鏡粉」影子？我上網求證，確有不少 review，也有單親媽媽多謝 Nex Playground，一個女人帶住 3 個細路，打機可以做埋運動、大人細路一齊玩。單親認真唔容易，而歐美有好多單親家庭。
挑戰四大 game console
自從手機和 iPad 普及，遊戲機的界線愈來愈模糊。以前打機，不管你任天堂、PS、世嘉還是 Xbox，都是望實電視機。今天已經發展 Switch 這種，既有手機模式又有電視模式。
Nex Playground 利用更簡單的技術，鏡頭和人工智能，推出了更多體感遊戲，繼承昔日 Xbox Kinect 和 Nintendo Wii 的「衣缽」。
問題是，直接進擊世界四大 gaming console，Playstation、Switch、Xbox 以至 Meta Quest，間間都千億美元規模、年銷量以百萬千萬計。
Nex Playground 區區賣出一萬幾千，即想挑機四大，名乎其實大衛（李景輝咁啱又叫 David）排戰哥利亞，憑 Nex 一腔熱血，夠揪嗎？夠錢嗎？
出嚟做世界，到底是場資本遊戲，講的是實力和錢。再講，歷史上曾經大受歡迎的遊戲主機，一夜之間跌下神枱的例子，也是多不勝數。
李景輝透露，往年諗過智能電視市場，或好快迎來「iPhone moment」，但跟一些電視和機頂盒品牌交手過後，他早已「摸清」底蘊，棄掉跟智能家電品牌「強強聯手」的想法。
「因為人哋最揾錢嘅方式，就係插播廣告。簡簡單單畀啲 video 人睇，跟住播廣告，唔好做咁多嘢，你見好多智能電視、機頂盒 service 都係噉，大家覺得搵下錢就算。」
結果 Nex 竟然自己做埋硬件、揾人搞 industrial design，自己出 console 殺入去 gaming console 市場！
「如果做得到，當我哋一落去傳統 distribution，將會係放係 Playstation、Xbox 同 Meta Quest 旁邊。呢個 category of business 真係好大，從未試過做一個 5 years projection 係咁大。嚟緊我會係想賣出 10 至 20 萬部，然後五年之內，再 growing to sell 每年數以百萬計甚至更多。唔係吹水，會得嘅話真係咁樣行。」
呢舖打大佬
過去一年，Nex Playground 成績包括 pre-sale 成功，推出了超過 20 款新遊戲，星級合作單位有 Hasbro、Sesame Workshop、Sky TV，得獎 Parents 雜誌 2023 年最佳玩具、Times 雜誌 2023 年最佳發明。
作為大偉挑戰哥利亞，李景輝不是第一次，上一趟 Editgrid 搞 Online Spreedsheet，創業時還未有 Google Doc，結果俾美國 Apple 收購。不過由單純的軟件開發工作，轉型體感遊戲、繼而加注進軍 gaming console 市場，面對一切前所未有的問題和挑戰，卻又不能同日而語。
兩年下來，之前 2500 萬美元 B 輪融資，或許已所餘無幾，因為工資之外，還有硬件需要找數予合作廠商、投資和開發銷售渠道。估計不論是融資或銷售，Nex Playground 今年需要有重大突破。
李景輝此刻心情，只有兩種可能，一是異常亢奮，二是極大壓力，或者三，兩者皆是！
採訪、撰文：尹思哲
The post 挑機全球四大 game console 香港仔打大佬 李景輝 appeared first on UNWIRE.PRO.