置頂活動文章 – 我們的十大勁歌金曲

*****

最明益自己友獎（林峰、關菊英、古巨基、孫耀威、鄧健泓、胡杏兒、黃宗澤、鍾嘉欣）
TVB自己人自己友玩晒。林峰拎金曲、關菊英傑出表現獎、古巨基最受歡迎男歌。但最抵死係，一班拍劇藝人孫耀威、鄧健泓、胡杏兒、黃宗澤、鍾嘉欣，幾乎囊括晒所有銅獎銀獎細獎。

最值得O嘴獎（關心妍）
關心妍表錯情領獎。兩小時內，關心妍片段@YouTube已超過3萬人瀏覽，肯定係明天C1甚或A1。崔建邦反應快值得一讚：「做咩咁踴躍跑出嚟」

[youtube=http://hk.youtube.com/watch?v=F3fGzdc50Lk]
新家姐傳說@fmt=22高清YouTube片

最人材凋零獎（香港樂壇）
農夫奪組合金獎，美其名天時地利，老實說人材凋零。當連hotcha三位妹妹仔、唔知咩水Mr.亦拿下銀銅獎，實在對香港所謂樂壇的前途無眼睇。

最窩囊表現獎（古巨基）
得獎點解要喊？楊千嬅都算，男人老狗古巨基，係幾百人面前流馬尿，少少男子氣概都無。唔通仲懷疑緊自己未夠本事只係僥倖？對唔住，我個人好唔buy呢種所謂喜極而泣。

最過癮金句獎（曾志偉）
宣佈最佳組合獎之前，曾志偉向後望一望蔡卓妍，講咗一句：「今年無咗Twins！」崔建邦即場O晒嘴接唔到落去。後來，曾志偉唔知有心定無意，似係臨場請蔡卓妍宣佈最後一首金曲。無可否認，有曾志偉係度攪攪震，十大頒獎娛樂性的確幾豐富。

最驚喜演唱獎（王祖藍）
TVB所謂「後浪推前浪」噱頭，王祖藍古巨基合唱，王祖藍表現比古巨基有過之而無不及，尤其真假音轉換技巧明顯較古巨基自然，攪到古巨基頓時相形見拙。

最實至名歸獎（G.E.M.）
17歲女新人金獎G.E.M. (鄧紫棋)，年紀輕輕，嗓音、技巧、台風俱佳，假如仍要屈居鐘嘉欣(女新人銀獎得主)之下，相信只會把鐘嘉欣推上不歸路之餘，亦難以服眾。

[youtube=http://hk.youtube.com/watch?v=4ChTkUHrvz4]

*****

其他想法/資訊
– 一邊睇大型電視節目，一邊瀏覽Twitter / 高登，能使節目的欣賞指數倍增。
– 2008十大勁歌金曲頒獎禮得獎名單@維基百科